चालू खरीप विपणन हंगामात आधारभूत किंमतीने झालेले व्यवहार; ‘इतक्या’ शेतकऱ्यांनी घेतला लाभ

Smiley face 2 min

नवी दिल्ली – खरीप पिकांचा 2020-21 चा विपणन हंगाम सुरू आहे. मागील हंगामाप्रमाणेच यंदाही किमान आधारभूत मूल्यानुसार सरकारने खरीप 2020-21 च्या हंगामामध्ये अन्नधान्य खरेदीचे व्यवहार किमान आधारभूत मूल्य देवून सुरू ठेवले आहेत.

खरीप विपणनच्या चालू हंगामामध्ये तांदळाची खरेदी निरंतर होत असून व्यवहार सुरळीत चालू आहेत. वेगवेगळ्या राज्यांतून आणि केंद्रशासित प्रदेशातून तांदळाची आवक होत आहे. यामध्ये पंजाब, हरियाणा, उत्तर प्रदेश, तेलंगणा, तामिळनाडू, उत्तराखंड, चंदिगड, जम्मू आणि काश्मिर, केरळ आणि गुजरात आणि आंध्र प्रदेश या राज्यांमध्ये (दि.26) जानेवारीपर्यंत 587.74 लाख मेट्रिक टनापेक्षा जास्त तांदळाची खरेदी झाली आहे. गेल्या वर्षी याच काळापर्यंत 488 .49 लाख मेट्रिक टन तांदूळ खरेदी झाली होती.

यंदा तांदळाच्या खरेदीमध्ये 20. 31 टक्के वाढ झाल्याचे दिसून आले आहे. एकूण 587.74  लाख मेट्रिक टन तांदूळ  खरेदीपैकी एकट्या पंजाबमध्ये 202.77 लाख मेट्रिक टन तांदूळ खरेदी झाला आहे. हे प्रमाण देशाच्या एकूण खरेदीपैकी 34.50 टक्के  आहे.

वाचा:  अखेर ग्रामपंचायतीवर तरूणाईची सत्ता! २१ वर्षाचा ऋतुराज सरपंच तर २३ वर्षाची राजश्री उपसरपंच

चालू खरीप विपणन हंगामामध्ये किमान आधारभूत मूल्यानुसार पिकांची खरेदी होत असून आत्तापर्यंत 84.73 लाख शेतकऱ्यांना त्याचा लाभ झाला आहे. त्यांच्या धान्य खरेदीसाठी 110965.89 कोटी रुपये दिले आहेत.

राज्यांकडून आलेल्या प्रस्तावांच्या आधारे तामिळनाडू, कर्नाटक, महाराष्ट्र, तेलंगणा, गुजरात, हरियाणा, उत्तर प्रदेश, ओडिशा, राजस्थान आणि आंध्र प्रदेश या राज्यांसाठी खरीप विपणन हंगाम-2020 मध्ये 51.92 लाख मेट्रिक टन डाळी आणि तेलबियांची खरेदी मूल्य समर्थन योजनेनुसार (पीएसएस) करण्यास मान्यता देण्यात आली आहे. तसेच 1.23 लाख मेट्रिक टन खोबरे खरेदी करण्यात येणार आहे. ही खरेदी आंध्र प्रदेश, कर्नाटक, तामिळनाडू, आणि केरळ यांच्या मागणीनुसार करण्यात येणार आहे. इतर राज्ये आणि केंद्रशासित प्रदेशांनी जर अन्नधान्य मागणीचे प्रस्ताव पाठविले तर ते त्वरित मान्य करण्‍यात येणार आहेत.

वाचा:  महावितरणच्या विरोधात शेतकरी रस्त्यावर

गुजरात आणि तामिळनाडू यांच्यासाठीही 2.50 लाख मेट्रिक टन डाळी, तेलबिया यांची रब्‍बी हंगाम 2020-2021 खरेदी करण्‍यात येणार आहे. या मागणीचा प्रस्‍तावानुसार ही खरेदी करण्‍यात येणार आहे. डाळी, तेलबिया आणि  खोबरे यांची खरेदी मूल्य समर्थन योजनेनुसार करण्यात येणार आहे. या पिकांच्या एफएक्यू ग्रेडची खरेदी थेट नोंदणीकृत शेतकरी बांधवांकडून 2020-21च्या अधिसूचित किमान आधारभूत मूल्यानुसार नियोजित हंगामामध्ये करण्यात येणार आहे. तसेच तिथे जर अन्नधान्याच्या किंमती किमान आधारभूत मूल्यांपेक्षा कमी झाल्या तर राज्यांनी निर्धारित केलेल्या संस्थांच्या माध्यमातून केंद्रीय नोडल संस्थांकडून नोंदणीकृत शेतकऱ्यांच्या पिकांची खरेदी करण्यात येणार आहे.

26 जानेवारीपर्यंत सरकारने नोडल संस्थांच्यामार्फत 3,01,581.08 मेट्रिक टन मूग आणि उडीद, तूर, भूईमुगाच्या शेंगा आणि सोयाबीन यांची किमान आधारभूत मूल्याने खरेदी केली. त्यासाठी 1622.95 कोटी रूपये मोजले. याचा तामिळनाडू, महाराष्ट्र, गुजरात,हरियाणा आणि राजस्थानमधल्या 1,62,352 शेतकरी बांधवांना लाभ झाला.

वाचा:  अखेर ‘ती’ भीती खरी ठरली! पोहरादेवी येथील कबिरदास महाराजांसह १९ जणांना कोरोनाची लागण

त्याचप्रमाणे (दि.26) पर्यंत 5089 मेट्रिक टन खोबरे खरेदी केले. यासाठी 52.40 कोटी रूपये किमान आधारभूत मूल्यानुसार पैसे देण्यात आले. त्याचा कर्नाटक आणि तामिळनाडूमधल्या 3961 शेतक-यांना फायदा झाला. सद्यस्थितीत खोबरे आणि उडीद यांचे दर बहुतांश प्रमुख उत्पादक राज्यांमध्‍ये किमान आधार मूल्यापेक्षाही जास्त आहेत. डाळी आणि तेलबिया यांची ज्या प्रमाणात आवक सुरू आहे, त्याप्रमाणेच राज्यांनीही आवश्यक खरेदी आणि इतर व्यवस्था करण्यास प्रारंभ केला आहे.

दरम्यान, चालू खरीप विपणन हंगामामध्ये कापूस महामंडळाने 8843847 गाठी (गासड्या) कापसाच्या खरेदी केल्या आहेत. यासाठी किमान आधारभूत मूल्याने 25826.59 कोटी रूपये देण्यात आले. याचा 18,13,359 कापूस उत्पादकांना लाभ झाला. ही खरेदी पंजाब, हरियाणा, राजस्थान, तेलंगणा, आंध्र प्रदेश, मध्य प्रदेश, महाराष्ट्र, ओडिशा, कर्नाटक आणि गुजरात या राज्यातून सुरळीत सुरू आहे.

आजच ई-ग्राम ॲप्लिकेशन प्ले- स्टोअर वरून डाउनलोड करा, डाउनलोड करण्यासाठी क्लिक करा. Download App